Næst síðasta umferð Subway deildar kvenna fór fram í kvöld með fjórum leikjum. Í Grindavík tóku heimakonur á móti Keflavík. Bæði lið eru pikkföst i deildinni og gat staða þeirra ekki breyst fyrir leikinn, Grindavík í fimmta sætinu en Keflavík búið að tryggja sér deildarmeistaratitil.
Jafnræði virtist ætla að vera með liðunum í upphafi leiks og var jafnt á flestum tölum í fyrsta leikhluta. Keflavík komst 20-15 yfir i byrjun annars leikhluta en þá skellti Grindavík í lás og náðu gestirnir ekki að setja stig á töfluna í tæpar 6 mínútur. Staðan í hálfleik 30-24 fyrir Grindavik.
Grindavík hóf þriðja leikhluta með látum og komust 37-24 snemma. Áhlaup Grindavíkur frá upphafi annars leikhluta var þarna 22-4 og hola Keflavíkur orðin djúp. Gestirnir börðust allt til loka og náðu muninum mest niður í þrjú stig. Grindavík gerði vel að halda í forystuna og lönduðu að lokum sex stiga sigri 63-57.
Elma Dautovic var atkvæðamest í liði Grindavíkur með 13 stig og 13 fráköst. Þá var Danielle Rodriques öflug að vanda með 8 stig, 8 fráköst og 7 stoðsendingar. Stig Grindavíkur dreifðust vel á milli og fengu margar að spreita sig.
Hjá Keflavík var Daniela Morillo líkt og oft áður frábær og endaði með 15 stig, 10 fráköst og 7 stolna bolta. Íslensku leikmenn Keflavíkur virtust ekki finna taktinn í kvöld.
Grindavík hefur átt þokkalegasta tímabil í vetur, verið nálægt þvi að vinna liðin fyrir ofan sig en þetta var einungis annar sigur liðsins á topp 4 liðunum í vetur. Sá fyrri kom fyrir áramót gegn Njarðvík. Liðið ætti að geta byggt ofan á góðar frammistöður í vetur og verður spennandi að fylgjast með framhaldinu.
Keflavík situr sem fastast í efsta sætinu fyrir lokaumferðina og geta ekki farið þaðan. Keflvíkingar þurfa ekki að örvænta þrátt fyrir tap kvöldsins, liðið hafði ekkert að keppa að og því fór sem fór.
