Njarðvík lagði Keflavík í Ljónagryfjunni í kvöld í Subway deild kvenna, 73-72. Eftir leikinn er Keflavík í efsta sæti deildarinnar með 42 stig á meðan að Njarðvík er í 4. sætinu með 28 stig.
Gangur leiks
Gestirnir úr Keflavík byrjuðu leik kvöldsins betur og leiddu mest með 8 stigum um miðbygg fyrsta leikhlutans. Heimakonur í Njarðvík eru þó snöggar að ranka við sér og eru komnar stigi á undan þegar sá fyrsti er á enda, 16-15. Í öðrum leikhlutanum var svo komið að Njarðvík að vera skrefinu á undan. Hóta því í nokkur skipti að taka forystuna almennilega undir lok fyrri hálfleiksins, en Keflavík gerir vel að halda í við þær og eru þær 4 stigum yfir þegar liðin halda til búningsherbergja, 33-37.
Stigahæst í liði heimakvenna í fyrri hálfleiknum var Raquel De Lima Viegas Laneiro með 12 stig á meðan að Daniela Wallen var komin með 16 stig fyrir Keflavík.
Keflavík nær svo að hanga á forystu sinni inn í seinni hálfleikinn. Lykilleikmaður þeirra Daniela Wallen heldur áfram að setja stig á töfluna og er komin með 23 stig þegar að þriðji fjórðungur er á enda, en þá leiða þær með 7 stigum, 52-59.
Keflavík nær svo að halda í forystuna nánast allan fjórða leikhlutann. Undir lokin ná heimakonur þó að gera leikinn virkilega spennandi með því að komast aðeins stigi frá þeim þegar um 20 sekundur eru eftir, 72-73. Njarðvík fær svo kjörið tækifæri til þess að jafna leikinn með 12 sekúndur eftir í stöðunni 72-74. Þær kasta þó boltanum frá sér, en í framhaldi klikkar Keflavík á tveimur vítum og Njarðvík kemst aftur í sókn þar sem að Raquel setur þrist og kemur Njarðvík í forystu með 1.1 sekúndu eftir, 73-72. Keflavík nær ekki skoti og Njarðvík sigrar með minnsta mun mögulegum, 73-72.
Atkvæðamestar
Atkvæðamest fyrir Njarðvík í leiknum var Isabella Ósk Sigurðardóttir með 13 stig og 11 fráköst.
Fyrir Keflavík var það Daniela Wallen sem dró vagninn með 25 stigum og 11 fráköstum.
Kjarninn
Sigur í kvöld skipti í raun og veru ekki öllu máli fyrir Njarðvík sem eru öruggar inn í úrslitakeppnina í 4. sæti deildarinnar með enga von um að komast nokkuð hærra. Þær hefðu þó getað sett stein í götu Keflavíkur sem eru í harðri baráttu við Val um efsta sætið og heimavöll út úrslitakeppnina.
Vegna tapsins þarf Keflavík nú að leggja Val í næstu umferð ef þær ætla sér að eiga möguleika á að vinna deildarmeistaratitilinn.
Hvað svo?
Bæði lið eiga leik næst komandi miðvikudag 15. mars, en þá fá Íslandsmeistarar Njarðvíkur nýliða ÍR í heimsókn og Keflavík tekur á móti Val.
