Fyrr í dag bárust þær fregnir að leikmaður Hamars hafi mátt þola kynþáttaníð þegar að liðið lék gegn Sindra á Höfn í Hornafirði í gær. Körfunni barst rétt í þessu yfirlýsing frá félaginu.
Aukasendingin fór yfir málið í lok síðasta þáttar, en hann er hægt að hlusta á hér fyrir neðan.
Í yfirlýsingunni, sem í heild má lesa hér fyrir neðan, er Hamar og þá sérstaklega leikmaður þeirra, Kinu Rockford beðinn afsökunar á framferðinu og útlistað er hvernig, með beinum hætti, Sindri mun takast á við málið.
Yfirlýsing frá Körfuknattleiksdeildar Sindra vegna kynþáttafordóma
Stjórn körfuknattleiksdeildar Sindra harmar og fordæmir með öllu kynþáttafordóma eða hvers kyns mismunun. Slíkt er í algjörri andstöðu við stefnu deildarinnar sem og Ungmennafélagsins Sindra í heild.
Við viljum biðja leikmenn Hamars, félagið í heild sinni, og þá sérstaklega Kinu Rockford afsökunnar á þeirri hegðun sem var viðhöfð. Málið verður tekið föstum tökum og er í skoðun innan félagsins í samstarfi við KKÍ en formaður KKÍ og varaformaður voru í stúkunni á umræddum leik.
Farið verður í eftirfarandi aðgerðir í kjölfar málsins til að tryggja að aðstæður sem þessar komi ekki upp aftur
- Unnið verður að rannsókn málsins og viðeigandi aðilum bannaður frekari aðgangur að leikjum félagsins
- Gæsla verður aukin á leikjum deildarinnar og þar með er vonast til að hægt sé að grípa strax inn í aðstæður af þessum toga ef þær koma upp
- Leitað verður eftir samstarfi milli UMF Sindra, skóla- og félagsmálayfirvalda og farið inn í skóla sveitarfélagsins með fræðslu um málefnið
Það er von stjórnar Körfuknattleiksdeildar Sindra að með þessu verði komið í veg fyrir að aðstæður sem þessar komi upp aftur og að leikmenn geti þannig spilað leiki án þess að eiga í hættu á að verða fyrir fordómum eða mismunun af einhverju tagi.
Virðingarfyllst
Stjórn Körfuknattleiksdeildar Sindra
