Ísland tekur á móti Spáni í Laugardalshöll annað kvöld í næst síðasta leik undankeppni HM 2023. Síðasti leikur þeirra verður svo gegn Georgíu úti í Tíblisi komandi sunnudag 26. febrúar. Möguleikar Íslands á að tryggja sig áfram og á lokamótið eru ennþá raunverulegir þrátt fyrir tvö erfið töp í síðasta glugga keppninnar. Fyrir leikinn eru Georgía og Ísland jöfn að sigrum með fjóra á meðan að Úkraína er einum sigurleik fyrir aftan með þrjá, en liðin þrjú berjast um síðasta sætið inn á lokamótið úr L riðil.
Karfan kom við á æfingu hjá liðinu fyrr í dag og ræddi við Hlyn Bæringsson leikmann liðsins um leikina tvo og hvernig það væri að koma aftur inn í hóp íslenska liðsins, en Hlynur lagði landsliðsskóna formlega á hilluna árið 2019.
