Einhver óvæntustu leikmannaskipti í sögu NBA áttu sér stað í nótt þegar Dallas Mavericks skiptu Luka Dončić til Los Angeles Lakers fyrir Anthony Davis.
Dončić, sem leiddi Mavericks í úrslit NBA deildarinnar síðastliðið vor, er með 28,1 stig, 8,3 fráköst og 7,8 stoðsendingar að meðaltali í leik en hefur glímt við meiðsli og einungis tekið þátt í 22 af 49 leikjum liðsins í vetur. Hann lék síðast á jóladag en var væntanlegur í búning aftur á næstu dögum.
Davis hefur leikið með Lakers síðan 2019-2020 tímabilið og vann titilinn með félaginu það árið. Hann er með 25,7 stig og 11,9 fráköst að meðaltali í leik í vetur. Þrátt fyrir að hafa verið ansi meiðslagjarn í gegnum tíðina hefur hann tekið þátt í 42 af 47 leikjum Lakers í vetur.
Dončić mun ekki hafa beðið um skipti frá Mavericks heldur höfðu forsvarsmenn þeirra samband við Lakers af fyrra bragði. Samkvæmt heimildum ESPN munu þeir hafa gefið upp vonina með að Dončić tæki mataræði og þrekþjálfun alvarlega en hann mun hafa verið í kringum 120 kg í kjölfar meiðslanna.
Auk Dončić fengu Lakers einnig Maxi Kleber og Markieff Morris. Mavericks fengu einnig Max Christie og fyrsta valrétt Lakers árið 2029. Utah Jazz var einnig partur af skiptunum en þeir fengu Jalen Hood-Schifino ásamt fyrsta valrétti Clippers og öðrum valrétti Mavericks í sumar.
