132 stig hjá Spurs gegn Bobcats

Tíu leikir fóru fram í NBA deildinni í nótt. Liðsmenn Charlotte Bobcats voru ekkert á því að leika vörn þegar San Antonio Spurs settu á þá 132 stig! Bulls höfðu betur gegn New York og eitt af heitari liðum deildarinnar í dag, Memphis Grizzlies, máttu sætta sig við tap á heimavelli gegn Atlanta Hawks.

 

Sjö leikmenn Spurs gerðu 10 stig eða meira í leiknum og þeirra atkvæðamestur var Danny Green með 23 stig. Kemba Walker var svo stigahæstur í liði Bobcats einnig með 23 stig. Spurs urðu með sigrinum fyrsta lið deildarinnar þetta tímabilið til að næla sér í 17 sigra og eru 10-2 á útivelli. Bobcats hinsvegar virðast vera að nálgast sitt fyrra formleysi frá síðustu leiktíð og hafa tapað sjö deildarleikjum í röð.

 

Marco Belinelli og Luol Deng voru báðir með 22 stig í liði Bulls en hjá Knicks var Raymond Felton með 27 stig, 5 fráköst og 5 stoðsendingar.

 

Josh Smith var með 24 stig, 8 fráköst og 4 stoðsendingar í sigurliði Hawks en hjá Memphis voru þeir Marc Gasol og Zach Randolph báðir með 18 stig og Randolph með 13 fráköst að auki.