{mosimage}
(Jón Arnór var stigahæstur í gær)
Jón Arnór var stigahæstur gegn Svíum.Íslenska karlalandsliðið tapaði með 12 stigum, 63-75, fyrir Svíum í lokaleik sínum á æfingamóti í Alkmaar í Hollandi í gær. Íslenska liðið endaði þar með í þriðja sæti á mótinu, vann Belgíu en tapaði fyrir Hollandi og Svíþjóð. Það var einkum slæmur annar leikhluti sem fór með leikinn hjá íslenska liðinu gegn Svíum en hann tapaðist 9-23 eftir að íslenska liðið hafði verið 19-14 yfir eftir 1. leikhlutann. Jón Arnór Stefánsson var stigahæstur í íslenska liðinu með 12 stig.
Sigurður Ingimundarson, þjálfari íslenska liðsins, dreifði spilatímanum á íslenska hópinn í leiknum við Svía og enginn í liðinu spilaði í meira en 21 mínútu. Íslenska liðið byrjaði leikinn ágætlega og kom sér síðan aftur inn í leikinn í fjórða leikhlutanum eftir að hafa tapað 2. og 3. leikhluta með 21 stigi (26-47). Það er stutt á milli leikja og strax eftir leik lagði íslenski hópurinn á stað til Dublin í Írlandi þar sem liðið spilar við Norðmenn í dag og síðan heimamenn á morgun. Það eru tveir síðustu æfingaleikir liðsins fyrir Evrópukeppnina.
„Þetta var slakt hjá báðum liðum í dag,“ sagði Sigurður Ingimundarson, landsliðsþjálfari, í samtali við Karfan.is í gær. „Ég er samt ánægður með hvar við erum og það er allt annar bragur á liðinu frá Norðurlandamótinu,“ sagði Sigurður. „Þegar við náum okkar dampi þá erum við að spila á mjög háu leveli en við þurfum meiri stöðugleika allan leikinn,“ sagði Sigurður.
Stig Íslands í leiknum við Svía:
Jón Arnór Stefánsson 12
Fannar Ólafsson 10
Logi Gunnarsson 9
Jakob Sigurðarson 8
Helgi Már Magnússon 8
Brenton Birmingham 4
Hlynur Bæringsson 3
Páll Axel Vilbergsson 3
Friðrik Stefánsson 3
Magnús Þór Gunnarsson 2
Kristinn Jónasson 1
Egill Jónasson skoraði ekki í leiknum.
Jón Norðdal Hafsteinsson lék ekki með vegna meiðsla.
Tveir leikir eru eftir af æfingaferð landsliðsins sem nú er statt í Dublin á Írlandi. Leikið verður gegn heimamönnum, Írum, og svo Norðmönnum áður en strákarnir halda heim á leið.
Frétt að stórum hluta til af www.kki.is
