Dominos deild karla:

Snorri Hrafnkelsson heim í Breiðablik

13.maí.2018  17:16 davideldur@karfan.is

"Gott að vera kominn aftur heim"

 

Breiðablik tilkynnti rétt í þessu að framherjinn Snorri Hrafnkelsson væri á leiðinni heim í Kópavoginn og mun hann því leika með liðinu á næsta tímabili. Breiðablik eru nýliðar í deild þeirra bestu, enþeir tryggðu sér sætið með sigri á Hamri í úrslitaeinvígi 1. deildarinnar.

 

Snorri hefur leikið með nokkrum liðum í Dominos deildinni, Keflavík, Njarðvík, KR og nú síðast Þór. Á síðasta tímabili var hann mikið frá vegna einkirningssóttar, en lék þó 16 leiki. Í þeim skoraði hann 5 stig, tók 3 fráköst og gaf stoðsendingu á rétt tæpum 20 mínútum að meðaltali í leik.

 

Líkt og kemur fram í fréttatilkynningu Breiðabliks þá er Snorri fæddur árið 1993 og er hann rúmir tveir metrar á hæð og mjög hreyfanlegur leikmaður sem getur bæði spilað stöðu kraftfarmherja og miðherja. Körfuknattleiksdeild Breiðabliks er hæstánægð með ráðningu Snorra og mun hann koma með úrvalsdeildarreynslu í ungt lið Breiðabliks.

 

Breiðablik einnig nýbúið að ráða þjálfara fyrir komandi tímabil í Pétri Ingvarssyni, en um Snorra sagði hann:

 

 

"Það er frábært að fá Snorra inn, hann leikmaður með reynslu úr úrvalsdeild og hann bætir við kærkomnum sentimetrum við hópinn. Þetta er leikmaður sem ég sé fyrir mér að passi vel inn í þann leikstíl sem við munnum leggja upp með næsta vetur“

 

Sjálfur sagði Snorri:

"Það er gott að vera kominn aftur heim og ég hlakka til að hjálpa liðinu í Dominosdeildinni, mér líst vel á hópinn og þjálfarann og á von þetta verði skemmtilegt tímabil“