Maltbikarkeppnin:

Njarðvík kom á óvart og fer í úrslitin

11.jan.2018  19:35 davideldur@karfan.is

Skallagrímur 75 - 78 Njarðvík

 

Njarðvík sigraði Skallagrím í undanúrslitum Maltbikarkeppninnar með 78 stigum gegn 75. Njarðvík mun því mæta annaðhvort Keflavík eða Snæfell í úrslitum keppninnar komandi laugardag.

 

 

Gangur leiks

Skallagrímur var heilt yfir sterkari aðilinn í fyrri hálfleik. Leiddu eftir fyrsta leikhluta með 5 stigum, 26-21 og þegar í hálfleik var komið með 7 stigum, 46-39.

 

Strax í upphafi seinni hálfleiksins létu Njarðvík vita að þær ætluðu sér ekki að tapa leiknum. Eftir þrjá leikhluta var staðan 60-58. Með mikilli baráttu og vel skipulögðum sóknarleik ná þær að vinna mun Skallagríms niður, jafna og komast yfir í upphafi fjórða leikhlutans. Æsispennandi lokamínúta var í leiknum, þar sem Skallagrímur fékk að lokum eitt skot til þess að jafna leikinn. Það skot geigaði hinsvegar og fór svo að Njarðvík sigraði leikinn með 3 stigum 78-75.

 

Kom ekki inná

Lykilleikmaður Skallagríms, Sigrún Sjöfn Ámundadóttir, sat allan leikinn á bekk Skallagríms, en hún er að koma til baka eftir að hafa farið úr axlarlið fyrr á tímabilinu. Ekki er á hreinu afhverju hún kom ekki inná, en leiða má líkur að því að hún hafi ekki verið tilbúin.

 

Gerðu vel!

Njarðvíkurliðið, í heild, var alveg frábært í dag. Baráttan þeirra varnarlega og þolinmæðin á hinum enda vallarins var öðrum til eftirbreytni. Geta þær unnið annaðhvort Snæfell eða Keflvík á laugardaginn? Með svipuðum leik gera þær það.

 

Tölfræðin lýgur ekki

Njarðvík kom sér í 30 skipti á vítalínuna í leiknum og voru með 76% nýtingu þar, á móti aðeins 20 skiptum hjá Skallagrím sem skaut 68% þar.

 

Hetjan

Í virkilega sterkum liðssigri Njarðvíkur var Shalonda Winton besti maður vallarins. Skoraði 31 stig, tók 15 fráköst og gaf 6 stoðsendingar, en hún spilaði allan leikinn.

 

Tölfræði leiks

Myndasafn #1

Myndasafn #2

Myndasafn #3

 

Umfjöllun / Davíð Eldur

 

Viðtöl: