U16 Drengja á Evrópumóti í Búlgaríu:

Strákarnir rúlluðu yfir Rúmeníu

11.ágú.2017  12:37 davideldur@karfan.is

 

Undir 16 ára lið drengja leikur þessa dagana á Evrópumóti í Búlgaríu. Í gær sigruðu þeir sinn fyrsta leik á mótinu gegn Sviss og svo í dag Rúmeníu með 67 stigum gegn 45.

 

Líkt og í leik gærdagsins var leikurinn jafn í byrjun. Eftir fyrsta leikhluta leiddi Ísland með 14 stigum gegn 11. Í öðrum leikhlutanum byggðu þeir svo upp smá forystu, en þegar að liðin héldu til búningsherbergja í hálfleik var Ísland 12 stigum yfir, 36-24.

 

Í upphafi seinni hálfleiksins létu drengirnir svo kné fylgja kviði. Eftir þrjá leikhluta leiddu þeir með 32 stigum, 60-28. Í lokaleikhlutanum slökuðu þeir svo aðeins á, en sigldu engu að síður góðum 22 stiga sigri í höfn.

 

Atkvæðamestur í íslenska liðinu var Veigar Hlynsson með 12 stig, 13 fráköst og 5 stoðsendingar.

 

Næsti leikur liðsins er á morgun kl. 17:30 gegn Hvíta Rússlandi. Hægt verður að fylgjast með beinni útsendingu hér.

 

Hérna er meira um liðið

Hérna er tölfræði leiksins

Hérna er meira um mótið

 

Hér er hægt að horfa á leik dagsins: