Íslendingar eru að eignast leikmann í einu af bestu karlaliðum bandaríska háskólaboltans. Hinn stórefnilegi Haukur Helgi Pálsson hefur nú gert munnlegt samkomulag við Maryland-háskólann, sem er einn af virtustu körfuboltaskólum Bandaríkjanna og varð meðal annars bandarískur meistari fyrir átta árum. Fréttablaðið ræðir í dag við Benedikt Guðmundsson um þessa stóru tilfærslu hjá Hauki Helga.

Haukur Helgi Pálsson hefur lengi skarað fram úr á Íslandi, hvort sem það er með Fjölni eða íslenska drengjalandsliðinu. Hann hefur verið undir smásjánni hjá evrópskum stórliðum og í vetur fréttist af miklum áhuga frá stórum bandarískum skólum eftir velheppnað tímabil Hauks með Monteverde-menntaskólanum.