Sá er öllu ræður í NBA deildinni, David Stern, sagði á blaðamannafundi í Taipei að ef leikvangaþróun í Evrópu myndi ganga í takt við það sem gerist í NBA deildinni þá gæti vel farið svo að lið í Evrópu væri í NBA deildinni. Stern var staddur í Taipei þar sem fyrsti sýningarleikur NBA liða á eyjunni fór fram aðfararnótt föstudags.

,,Svona sjáum við þróun körfuboltans í heiminum,“ sagði Stern og bætti við að NBA deildin hefði áform um að deildarleikur færi fram í London fyrir Ólympíuleikana 2012. Eini deildarleikur NBA deildarinnar utan Bandaríkjanna fór fram í Japan í kringum árið 1990.

 

Stern horfir ekki aðeins til Evrópu heldur nefndi einnig Suður-Ameríku og Afríku en áréttaði þó að leikvangaþróun yrði að vera NBA deildinni samboðin.

 

Hvort Stern og félagar í NBA deildinni hyggja á heimsyfirráð í körfuboltanum skal ósagt látið en þá skal engu að síður bent á að það er ýmislegt t.d. í Evrópuboltanum sem NBA mætti taka sér til fyrirmyndar svo aðlögunin, ef af þessu verður, ætti alls ekki að vera einhliða.

 

nonni@karfan.is