Helgi Már Magnússon og Jakob Örn Sigurðarson verða í eldlínunni með sínum félögum í sænsku úrvalsdeildinni í kvöld. Jakob og félagar í Sundsvall mæta Boras á útivelli en Helgi og Solna taka á móti Södertalje í Solnahallen.

 

Jón Arnór Stefánsson var í stuði er hann gerði 19 stig fyrir spænska úrvalsdeildarliðið CB Granada í 86-76 sigri gegn DKV Joventut um helgina.

 

Logi Gunnarsson og félagar í franska NM1 liðinu St. Etienne máttu þola nauman ósigur á útivelli um helgina er St. Etienne tapaði 69-63 gegn Lievin. Logi var í byrjunarliðinu og gerði 9 stig í leiknum.

 

Fá félög eða nokkur í heiminum geta státað sig af viðlíka stærðargráðu í körfubolta, fótbolta og handbolta eins og Barcelona. Félagið á lið í allra fremstu röð í þessum þremur boltagreinum og þar á bæ tíðkast að menn reyni nú aðeins fyrir sér í annarri íþrótt en þeirri sem veitir þeim myndarlega bankainnistæður.

 

Bikarúrslitaleikurinn í spænska Konungsbikarnum fór fram um helgina þar sem Barcelona skellti Real Madrid 80-61. Fran Vázquez var atkvæðamestur í liði Barcelona með 14 stig en Ricky Rubio kom honum næstur með 13. Hjá Real Madrid voru Darjus Lavrinovic og Novica Velickovic báðir með 11 stig.