Brynjar Þór Björnsson hrökk í gírinn þegar KR styrkti í kvöld stöðu sína á toppi Iceland Express deildar karla með 89-77 sigri á Njarðvíkingum. Brynjar sallaði niður 33 stigum í leiknum og fór fyrir sóknarleik Íslandsmeistaranna í síðari hálfleik. Jóhann Árni Ólafsson var atkvæðamestur í liði Njarðvíkinga með 19 stig í kvöld en grænu gestirnir stóðust ekki prófið á lokasprettinum þar sem þeir gerðu aðeins þrjú stig fyrstu átta mínúturnar í fjórða leikhluta. KR hefur nú 26 stig á toppi deildarinnar en Njarðvíkingar eru í 5. sæti áfram með 22 stig og hafa nú tapað þremur deildarleikjum í röð.

 

Tveir stórleikir fóru fram í kvöld þegar Grindavík og ÍR mættust í undanúrslitum Subwaybikarsins í karlaflokki og þá mættus Íslandsmeistarar KR og Njarðvík í DHL-Höllinni. Skemmst er frá því að segja að Grindavík tryggði sér sæti í úrslitaleik bikarsins gegn Snæfell en KR lagði Njarðvík og styrkti stöðu sína á toppi deildarinnar.

 

 

Landsliðskonurnar Helena Sverrisdóttir og María Ben Erlingsdóttir voru í eldlínunni um helgina með bandarísku háskólaliðunum sínum. Helena og TCU unnu öruggan sigur á Air Force skólanum en María og félagar í UTPA máttu þola tap gegn Chicago State.

 

Leikmenn KFÍ mættu tilbúnir og hungraðir í mikilvæga leik þegar Valsmenn mættu vestur á firði í 1. deild karla í gærkvöldi. Strax í fyrsta leikhluta var tóninn gefinn og staðan eftir hann var 23 - 8 heimamönnum í vil. Ljóst að það yrði á brattann að sækja fyrir gestina. KFÍ liðið hélt einbeitingu sinni og varðist tilraunum Vals til þess að komast aftur inn í leikinn og að lokum fóru leikar svo að sannfærandi sigur KFÍ var í höfn, 89-65. KFÍ situr nú á toppi deildarinnar með fjögurra stiga forystu.

 

Í kvöld ræðst það hvort Grindavík eða ÍR mæti Snæfell í Laugardalshöll síðar í þessum mánuði í úrslitum Subwaybikarsins í karlaflokki. Snæfell tryggði sér farseðilinn í Höllina í gær með 64-90 yfirburðasigri á Keflavík í Toyotahöllinni í Reykjanesbæ.