Áralangri vinnu í Garðabænum er nú að berast ávöxtur hægt og rólega en það eru ekki mörg ár síðan að menn köstuðu því fram að ljósár væru þangað til félagið færi að skila leikmönnum upp úr yngri flokkum í meistaraflokkinn. Nýjasti liðsmaður meistaraflokks Stjörnunnar af færibandinu er Dagur Kár Jónsson leikmaður í 10. flokki félagsins en þar fer efnilegur bakvörður og fleiri eru farnir að banka. Ungir menn í Garðabæ verða þó að spýta í lófana því um þessar mundir er valinn maður í hverju rúmi hjá Stjörnunni og margir sem búast við liðinu sterku á komandi tímabili. 

 

Sinn er siður í hverju landi og því fá dansmeyjar FIBA nú að kynnast á Heimsmeistaramótinu í körfuknattleik. Dansararnir hafa nú verið bannaðir á leikjum heimamanna í Tyrklandi því klæðaburður þeirra og trakteringar á parketinu þykja móðgandi í Tyrklandi en Tyrkir eru að langstærstum hluta múslimar. Samkvæmt Íslam er konum ekki leyfilegt að sýna bert hold á almannafæri. 

 

Stærstu spurningunni á Sauðárkróki er enn ósvarað! Verður Svavar Atli Birgisson með liðinu í vetur? Kappinn liggur nú undir feld og nýráðinn þjálfari Borce Ilievski segir enn vanta stóran leikmann í hópinn og vonast til að finna hann hérlendis. Svavar kemur beint af færibandinu frá Stólunum og hefur verið einn af sterkustu leikmönnum félagsins um árabil. Hvort kappinn verði með eður ei kemur í ljós áður en að fyrstu umferð kemur í úrvalsdeildinni en þangað til skulum við heyra hvað nýji þjálfarinn Borce hefur að segja um stöðu mála í Síkinu. 

 

Gunnar Sverrisson tók við stjórn ÍR á miðju síðasta tímabili þegar Jón Arnar Ingvarsson sagði starfi sínu lausu. Undir stjórn Gunnars komust ÍR-ingar inn í úrslitakeppnina en duttu út í fyrstu umferð gegn erkifjendunum í KR. Í sumar gekk Hreggviður Magnússon í raðir KR-inga en ÍR endurheimti Sveinbjörn Claessen úr meiðslum. Karfan.is tók púlsinn á Gunnari og ÍR-ingum.